مين اللي ضم الروح
وطبطب على القلوب
بشويش
مين اللي غير عتمة الأوضة
وفتح البيبان والشيش
مين اللي خلى النبي مرجوف
مين اللي دثر قلبه
وطمنه م الخوف
مين اللي زمل روحه
ودوقه بالشوف
مين اللي ائتمن الرسول ع الجوف
مين اللي ساعده
وكتب الرسالة
حروف
الحرف واعد والاسم صاعد
في السما لؤلؤي
خديجة بنت الحسب
أم الشواهد بندقي
مالت على شال الحبيب
تتنفسه طِيْبَة
أم الولاد المستكينة
الحاضرة في الغيبة
صاحبة الحضن الشجي
والطمأنة
والهيبة
ظاهر كلامها عسل
باطن كلامها العشق
قالوا عليها كتاب
قالوا عليها حروف
سلم عليها ملاك
تلبس حجابها
كسوف
ضحك الملاك واتجن
قلبك خديجة يجن
مكسوفة طعم النور
والنور خرج مشكاة
قلب الحبيب مصباح
رأت خديجة القلب
قاد قلبها تنور
طيب الحبيب كالشال
الشال نسيجه دمشق
في دمشق بيت معروف
قال النبي عنه
تخرج هناك النار
النار هدت موسى
وعصايته م الشجرة
الشجرة طعم اللبن
لم يشرب الخمرة
الخمر سكر الأحبة
والحب راجع نبات
فهمني معنى السرور
حكى لنا طعم السكات
العشق أصله النور
والنور صبح مشكاة
صبح الحبيب مصباح
وقزازة م البلور
بلوري في الكوكب
والحب مش موكب
داير يطوف ويطوف
الحب طعم وشوف
والشوف هتف
"دري"
يا كوكبي الدري
هات لي معاك شجرة
شرقية غربية
واملا القزازة بزيت
الزيت صبح تنور
والعشق أصله النور
يا رب كل الناس
احمينا م العتمة
نورنا بالأحباب
واهدي سلامنا حبيب
والفاتحة ليها وجيب
لما خديجة تجيب
غطا النبي وتغيب
يلمس غطاها بحب
ويدوق وقلبه يدق
همس السلام في الغيب
